Gazagystanyň üç ýyllyk býudjet taslamasy Kurultaýda makullandy

Gazagystanyň Kurultaý deputatlary 2027–2029-njy ýyllary öz içine alýan «Respublikanyň býudjeti hakda» kanun taslamasyny birinji okamakda makullady. Habary NUR.KZ Kurultaýyň metbugat gullugyna salgylanyp ýaýratdy. Kurultaýyň Telegram kanalynda resminamada makroykdysady durnuklylygyň saklanmagy, ähli sosial borçnamalaryň ýerine ýetirilmegi we infrastrukturanyň öňdebaryjy ösdürilmegi ýaly möhüm bentleriň ýer alandygy bellenildi.

Taslama laýyklykda, orta möhletli döwürde ÜİÖ-niň ortaça ýyllyk ösüş depgini 5,4 göterim bolar. Ýyllyk inflýasiýanyň 2027-nji ýylda 7,5–9,5 göterim çäginde saklanmagy, 2029-njy ýyla çenli bolsa 6 göterime düşmegi meýilleşdirilýär. Döwrüň ahyrynda respublika býudjetiniň kemçiliginiň ÜİÖ-niň 0,4 göterimine çenli azaldylmagy we öz girdejileriniň 23,4 trillion tenge ýetirilmegi göz öňünde tutulýar.

2027-nji ýyl üçin öz girdejileriniň 19,9 trillion, geçirimleriň 5,5 trillion, çykdajylaryň bolsa 30,2 trillion tenge bolmagy garaşylýar; çykdajylaryň üçden biri adam kapitalyny ösdürmäge gönükdiriler. Deputatlar çaklamalaryň takyklygyna, öz girdejileriniň durnukly ösüşine we Milli gaznadan geçirimlere bagly bolmagyň azaldylmagyna üns çekdiler.