Gyrgyzystanda 200 müň adama arassa suw taslamalary açyldy, Tamçy zolagynda gurluşyk dowam edýär

Gyrgyzystanyň Baş ministri Adylbek Kasymaliýew ýurduň ýedi sebitinde içmeli suw üpjünçiligi boýunça 70 desga açylyşyna onlaýn görnüşde gatnaşdy. Hökümetiň habaryna görä, dabara Ysyk-Köl sebitiniň Karakol şäherinde geçirilip, şol ýerde häzirki zaman arassalaýjy desgalar hem ulanyşa berildi. Taslamalaryň takmynan 200 müň adama arassa içmeli suw getirmegi göz öňünde tutulýar.

Kabinetiň maglumatyna görä, 2021-nji yldan bäri suw üpjünçiligi we kanalizasiýa pudagyna 567,5 million dollar maýa çekilipdir. Soňky bäş ýylda 264 ilatly punktda taslamalar durmuşa geçirilip, 663 müňden gowrak adam hilli içmeli suwa elýeterlilik gazanypdyr. 2026-njy ýylda bu pudaga takmynan 5 milliard som ugradylypdyr.

Kasymaliýew sapary dowamynda Ysyk-Köldäki Tamçy maxsus maliýe-maýa goýum ýerleşiginiň gurluşygy bilen hem tanyşypdyr. Bu ýerde ofis merkezleri, ýaşaýyş toplumlary we dynç alyş infrastrukturasy meýilleşdirilýär. Halkara maýadarlary çekmek üçin hukuk, salgyt we walýuta boýunça aýratyn tertip ulanylar. Hökümet gurluşygyň dowam edýändigini bildirse-de, tamamlanmak möhletini we taslamanyň bahasyny mälim etmedi.