DKTR-da Akdeniz Fyrtynasy-2026 tälimi geçirildi

Şehit Ýüzbaşy Cengiz Topeliň adyndaky Akdeniz Fyrtynasy-2026 tälimi Demirgazyk Kipr Türk Respublikasynda (DKTR) ähli basgançaklary bilen üstünlikli geçirildi. Türk Silahly Güýçleriniň (TSK) gury, howa we deňiz bölümleri, şeýle hem DKTR Howpsuzlyk güýçleriniň we Hususy güýçler gomandanlygynyň bölümleri tälime gatnaşdy. Tälim Girne sebitindäki Sadrazamköý, Beýköý we Sarybaşaklar ýerlerinde geçirildi.

Tälimiň Gündogar Ýerorta deňzinde howada, gurakda we deňizde utgaşykly operatiw ukybyny barlamak maksadyny göz öňünde tutandygy habar berildi. Tälimde Türk F-16 söweş uçarlary, T129 ATAK helikopterleri, fregatlar, şeýle hem milli senagat önümleri HİSAR-O we KORKUT ulgamlary ulanyldy. Roketsan tarapyndan ösdürilen L-UMTAS we Cirit raketalary hem tälimde ulanyldy. Paraşütçüler 3 müň metr beýiklikden hopuldylar.

Tälimi DKTR Parlamentiniň başlygy Ziýa Öztürkler, premýer-ministr Ünal Üstel we Türkiýäniň Lefkoşadaky ilçisi Ali Murat Başçeri synlady. Öztürkler Günorta Kipr rum administrasiýasynyň dürli ýurtlar bilen harby şertnamalar baglaşandygyny belläp, “Emma biziň ene watanymyz Türkiýe Respublikasy şu ýerde” diýdi we Türk goşunyny dünýädäki iň güýçli harby güýçleriň biri hasaplady.