Kazatomprom Rosatom bilen şertnamany ret edip, uranyny Hytaýa tassyklady

Gazagystanyň döwlet kompaniýasy Kazatomprom, 7-nji oktýabrda geçirilen adatdan daşarky umumy ýygnakda Hytaýyň SNURDC kompaniýasy bilen uran konsentratyny üpjün etmek şertnamasyny paýdarlaryň 88,63 göterimi bilen tassyklady. Şol ýygnakda Rosatomyň düzümindäki Uranium One Group bilen meňzeş şertnama bolsa 5,39 göterim goldaw, 6,27 göterim garşy ses we 88,34 göterim bitarap ses bilen ret edildi.

Elmedia paýdarlar sanawyna salgylanyp, Samruk-Kazyna gaznasynyň 62,99 göterim, Maliýe ministrliginiň Milli gaznasy arkaly 12,01 göterim paýa eýe bolandygyny habar berdi. Neşir bu derejedäki bitarap sesleriň döwletiň gönüden-göni gatnaşygy bolmazdan mümkin däldigini öne sürýär.

Ret edilen şertnamada iberiş Russiýanyň Seversk şäherindäki Sibir himiki kombinatyna edilmeli bolupdy. Rus diplomatlary bolsa Fransiýanyň we kollektiw Günbataryň Gazagystanyň uran bazaryna basyş edýändigini öne sürdi.