Gyrgyzystanyň energetika ministri: Öçürilmeler barada öňünden duýdurarys

Gyrgyzystanyň Energetika ministrligi indiki güz-gyş döwründe elektrik energiýasy bilen üpjünçilikde mümkin bolan çäklendirmeler barada ilaty öňünden we açyk görnüşde habarlandyrmagy meýilleşdirýär. Ministr Altynbek Rysbekow muny ýurduň parlamenti Žogorku Keneşiň mejlisinde deputat Dastan Bekeşewiň soragyna jogap berip mälim etdi.

Deputat Bekeşew gyşda elektrik üpjünçiliginiň üznüksizligi barada berlen kepillere şübhe bilen garaýandygyny bildirip, kuwwat ýetmezçiligi ýüze çykan halatynda raýatlaryň we telekeçileriň taýýarlyk görüp bilmegi üçin takyk öçürilme tertiplerini öňünden çap etmegi talap etdi. Rysbekow bu başlangyjy goldap, hünärmenleriň kynçylyk döredip biljek energiýa düwünlerini kesgitlemek üçin eýýäm çaklama hasaplamalaryny geçirýändigini aýtdy.

Ýük azaltmak tertipleri ýerli häkimiýet edaralary bilen ylalaşylar, kuwwat ýetmezçiligi we nobatly öçürilmeler barada maglumat bolsa ilata açyk, wagtynda we doly görnüşde ýetiriler. Ministrlik ýurduň her ýyl takmynan 4 milliard kilowatt-sagat elektrik energiýasyny import edýändigini we gyş döwri üçin resmi taýdan meýilleşdirilen öçürilmeleriň göz öňünde tutulmaýandygyny, emma iň ýokary ýük sagatlarynda kuwwat ýetmezçiliginiň mümkindigini belledi.