Türkmen mugallymy Ýaponiýada halkara bilim maksatnamasyna gatnaşýar

Türkmenistanyň Oguz han adyndaky Inžener-tehnologiýalar uniwersitetiniň kiberfiziki ulgamlar kafedrasynyň mugallymy Nurjemal Baýramowa Ýaponiýanyň Hirosima uniwersiteti tarapyndan 19–28-nji oktýabr aralygynda geçirilýän Şöhleleriň dinamikasy we tizlendiriji tehnika boýunça 9-njy halkara okuw maksatnamasyna (ISBA 2026) gatnaşýar.

Dürli ýurtlardan gatnaşyjylary birleşdirýän bu maksatnama halkara ylym we bilim hyzmatdaşlygyny ösdürmegi, hünärmenleri taýýarlamagy, ugurdaş ýokary okuw mekdepleriniň mugallymlarynyň hünärini kämilleşdirmegi hem-de öňdebaryjy tehnologiýalar ulgamynda tejribe alyşmagy maksat edinýär. Hirosima uniwersitetiniň öňdebaryjy professorlarynyň ýolbaşçylygyndaky sapaklarda diňleýjiler pudagyň esasy nazary düşünjeleri bilen tanyşarlar we tizlendiriji tehnologiýalaryň iş ýörelgeleri baradaky bilimlerini giňeltjekler.

Meýilnamanyň medeni çäginde gatnaşyjylar üçin Hirosimanyň taryhy ýerlerine we gözel künjeklerine syýahatlar guralýar. Çeşmä görä, türkmen mugallymynyň bu maksatnama gatnaşmagy iki ýurduň arasynda ylym we tehnologiýa gatnaşyklarynyň ösmegine, bilim hiliniň kämilleşmegine we bilim beriş işine innowasiýalaryň ornaşdyrylmagyna goşant goşar. Maksatnamada alnan bilimler we tejribe geljekde türkmen uniwersitetiniň okuw-terbiýe we ylmy-barlag işlerinde ulanylar.