Gyrgyzystanyň prezidenti Japarow oba hojalyk ýerlerini goramagy çagyrdy

Gyrgyzystanyň prezidenti Sadyr Japarow oba hojalyk ýerlerini jaýlar gurmak üçin özgertmegi togtatmaly diýip belledi. Ol bu pikirleri Manas şäheriniň we Suzak etrabynyň ilaty bilen duşuşykda aýtdy.

Japarowyň sözlerine görä, Gyrgyzystanyň territoriýasynyň 94 göterimi daglardan, 6 göterimi bolsa düzlüklerden ybarat. Bişkek, Oş, sebit merkezleri we obalar şol düzlüklerde ýerleşýär. Sowet Soýuzy dargan wagty ilatyň 3 million bolandygyny, häzir 7 million boldugyny we 2050-nji ýyllarda 10 million ýetjegini aýdan Japarow, şahsy öýler üçin bir gezekde 360 gektar ýeriň täzeden kategoriýasynyň üýtgedilýändigini belledi. Bazar-Korgon etrabynda 12 sany dokuz gatly ýaşaýyş jaýynyň gurulýandygyny mysal getirdi.

Japarow azyk howpsuzlygy üçin oba hojalyk ýerlerini goramagyň möhümdigini, ýurdunyň käbir azyk önümlerini Gazagystandan we Russiýadan import etmäge mejbur bolýandygyny aýtdy. Ol ýer meselesi boýunça jemgyýetçilikde dürli pikirleriň bardygyny ykrar edip, ýerleriň Hytaýa 49 ýyllykka berilýändigi barada aýdylýan çaklamalaryň dogry düşünilmelidigini belledi we ýolbaşçylara şu wagtdan başlap oba hojalyk ýerlerini özgertmegi bes etmäge çagyrdy.