Türkmen oba hojalyk instituty talyplary ylmy taslamalar bäsleşigine çagyrýar

Türkmen oba hojalyk instituty Türkmenistanyň we daşary ýurtlardaky ýokary okuw mekdepleriniň talyplaryny 11–12-nji noýabrda geçiriljek III Halkara “Agroinnowasiýalar: durnukly ösüş ýoly” ylmy taslamalar bäsleşigine gatnaşmaga çagyrýar. Bäsleşik onlaýn görnüşde iki tapgyrda geçiriler. Hünärine we okuw ýylyna garamazdan gyzyklanýan ähli talyplar gatnaşyp bilerler. Çäräniň resmi dilleri türkmen, iňlis we rus dilleridir.

Bäsleşik oba hojalygy, IT we biznes taslamalary boýunça geçiriler. Işi bir awtor ýa-da iň köp bolanda iki talyp bilelikde taýýarlap biler. Gatnaşyjylar žýuri üçin ýazmaça düşündiriş we taslamanyň prezentasiýasyny taýýarlamaly. Işler täzelik, nowatçylyk, mazmunlylyk, möçber, amala aşyrylyş mümkinçiligi we daş-töweregiň gurşawyna täsir ölçegleri boýunça baha berler. Ýeňijilere instituty tarapyndan I, II we III derejeli diplomlar berler.

Gatnaşmak isleýänler 5-nji noýabra çenli tohi.tm.info@gmail.com salgysyna elektron poçta arkaly ýüz tutmaly. Guramaçylara görä, bäsleşik talyplaryň ylmy pikirlenişini, gözlegçilik başarnyklaryny we döredijilik ukyplaryny ösdürmäge gönükdirilendir.