Mickoski: Meniň borjum geçmiş bilen meşgullanmak däl, çagalarymyz üçin geljek gurmak

Demirgazyk Makedoniýanyň Premýer-ministri Hristijan Mickoski, 23-nji oktýabrda Makedoniýanyň Rewolýusiýa göreşi güni (VMRO) mynasybetli çykyşynda ýurdunyň Ýewropa Bileleşigine agza bolmak prosesine, milli kimligiň goralmagyna we ykdysady ösüşe degdi. Mickoski, geçmişdäki dawalaşyklaryň ornuna geljek nesillere has güýçli we adalatly ýurt galdyrmaga üns berýändiklerini aýtdy.

Mickoski ýurdunyň Ýewropa Bileleşigine agza bolmak prosesinde uzak wagtdan bäri garaşýandygyny belläp, ähli kynçylyklara garamazdan gepleşiklerden ýüz öwürmeli däldigini aýtdy. Sabyrlylygyň we akylly syýasatyň zerurdygyny aňladan Mickoski, milli kimligiň we taryhy ýadyň daşarky basyşlar bilen üýtgedilip bilinmejekdigini nygtady.

Hökümetiň işlerine degen Mickoski, awtoýol taslamalary, tebigy gaz geçirijileri, bilim maýadarlygy we häkimliklere geçirilen serişdeler barada maglumat berdi. Bilim infrastrukturasyna 90 million ýewrodan köp maýa goýulandygyny, häkimliklerdäki 1200-den gowrak taslama üçin ýarym milliard ýewrodan geçýän serişde bölünendigini belledi. Döwlet dolandyryşynda adalatyň, dogruçyllygyň we deň mümkinçilikleriň ähmiýetini belläp, çykyşyny “Ýaşasyn Makedoniýa” sözleri bilen tamamlady.