KHŞG Täjigistanyň Owganystan serhedini berkitmek üçin harby enjam berer

Kollektiw howpsuzlyk şertnamasy guramasy (KHŞG) 2026-njy ýylyň ahyryna çenli Täjigistanyň Owganystan bilen serhedini berkitmek maksady bilen ýaragyň we harby tehnikanyň üpjünçiligine başlamagy meýilleşdirýär. Bu programmada Gyrgyzystan hem gatnaşar. KHŞG-nyň baş sekretary Taalatbek Masadykow bu barada 21-nji oktýabrda žurnalistler bilen wideo köprüsi arkaly geçirilen söhbetdeşlikde habar berdi.

Masadykowyň sözlerine görä, Täjigistana ilkinji üpjünçilikler Gyrgyzystandan, Gazagystandan, Russiýadan we Belarusdan garaşylýar. Programmanyň birinji tapgyry eýýäm tamamlandy: täjik tarap üpjünçileri kesgitledi we sargyt mukdarlaryny ylalaşdy. Indi serhedi goramak üçin ýarag, harby tehnika we enjamlary üpjün etmegi göz öňünde tutýan ikinji tapgyr başlandy.

Ýaragyň anyk görnüşleri, üpjünçiligiň möçberi we bahasy heniz mälim edilmedi. Masadykow programmanyň guramanyň günorta serhetleriniň howpsuzlygyny güýçlendirmäge gönükdirilendigini we Owganystana hem onuň ilatyna howp abanmaýandygyny belledi. Programma 2024-nji ýylyň noýabrynda KHŞG-nyň ýolbaşçylary tarapyndan tassyklanyldy we 2029-njy ýylyň ahyryna çenli amala aşyrylar.