Türkmenistan Brýusselde Merkezi Aziýa — AB maýa goýum hyzmatdaşlygynyň geljegini ara aldy

Türkmenistan Brýusselde geçirilen Merkezi Aziýa we Ýewropa Bileleşiginiň strategiki institutlarynyň birinji Forumyna gatnaşdy. Ykdysady mejlisde Ýewropa Bileleşiginiň «Global Gateway» başlangyjy çäklerinde bilelikdäki maýa goýum taslamalary, ýokary goşulan bahaly önümçilik we häzirki zaman tehnologiýalaryny ornaşdyrmak ara alyndy. Muny Belgiýadaky Türkmenistanyň ilçihanasy şenbe güni habar berdi.

Türkmenistany Daşary işler ministrliginiň geňeşçisi Batyr Niýazliýew we ilçi Sapar Palwanow wekilçilik etdi. Iki günlük çekişmelerde howpsuzlyk, söwda, ulaşyk we energetika baglanyşyklary, maýa goýum we sanlylaşdyrma meseleleri görkezildi; Transkaspiý ulag koridoruna aýratyn üns berildi.

Türkmen tarapy 2027-nji ýylda Aşgabatda «Merkezi Aziýa — AB» Ykdysady forumyny geçirmek başlangyjyny öňe sürdi we ileri tutulan ugurlardan anyk taslamalara geçmegiň ähmiýetini nygtady. Energetika hyzmatdaşlygy, şol sanda Türkmenistanyň tebigy gazyny Ýewropa bazaryna ibermek mümkinçilikleri hem-de Türkmenbaşy halkara deňiz portunyň logistika mümkinçilikleri hem ara alyndy.