Türkmenistan–ABŞ Biznes Geňeşiniň wekiliýeti noýabrda Aşgabada geler

Türkmenistan–ABŞ Biznes Geňeşi (USTBC) 4–5-nji noýabrda Aşgabatda biznes-missiýa geçirer. Geňeşiň resmi web sahypasynda habar berilişi ýaly, sapar ABŞ-nyň Döwlet departamenti bilen utgaşykly gurnalýar. Döwlet departamenti iki ýurduň hökümetleriniň arasynda ýyllyk ikitaraplaýyn maslahatlaşmalara gatnaşmak üçin Türkmenistanyň paýtagtyna wekiliýet iberer.

Bu sapar iki ýurduň arasyndaky iş gatnaşyklaryny dowam etdirýär. 2026-njy ýylyň iýun aýynda Geňeşiň ýerine ýetiriji direktory Eric Stewart Amerikan kompaniýalarynyň wekiliýetine ýolbaşçylyk edip, Aşgabada geldi. 3-nji iýunda Türkmenistanyň Söwda-senagat palatasynda ABŞ-nyň takmynan on kompaniýasynyň wekilleriniň gatnaşmagynda tegelek stol geçirildi. Türkmen tarapyna Ministrler Kabinetiniň Başlygynyň orunbasary Nokerguly Atagulyýew ýolbaşçylyk etdi.

Geňeş 2008-nji ýylda döredildi, merkezi Waşingtonda ýerleşýär. Geňeşiň resmi web sahypasyna görä, onuň işi Türkmenistan bilen ABŞ-nyň arasyndaky söwda we maýa goýum baglanyşyklaryny ösdürmäge gönükdirilen.