Žaparow Gazak oppozisiýaçysy Ablýazowyň sözlerini ýalan diýdi

Gyrgyzystanyň prezidenti Sadyr Žaparow, Gazagystanyň oppozisiýa işgäri Muhtar Ablýazowyň Bişkege gelmek haýyşyny ret edendigini aýtdy. Ablýazow Gyrgyz pasportynyň bardygyny öňe sürüpdir. Žaparow 2020-nji ýylyň oktýabr wakalaryndan soň bolan söhbedi gürrüň berip, Ablýazowyň Gyrgyzystanda galmak we ondan Gazagystan häkimiýetlerine garşy syýasy işleri alyp barmak isleýändigini aýtdy.

Žaparow goňşy ýurduň içerki syýasatyna goşulmak we Ablýazow sebäpli Gazagystan bilen gatnaşyklary bozmak niýeti bolmandygy üçin ret jogabyny berendigini aýtdy. Prezident şeýle hem Ablýazowyň, Žaparowyň 2020-nji ýylyň oktýabr aýynda ondan pul soranlygy baradaky aýdan sözüne jogap berdi.

"Fransiýada ýaşamak üçin özi gazak halkyndan pul ýygnaýan adamdan men pul soradym diýip kim ynanar? Halk meni eýýäm türmeden çykaryp, häkimiýete getirdi. Diýmek, pulsyz hem meni saýlap bilerdi" diýip, Žaparow aýtdy. Ol Ablýazowyň pul barada aýdan sözlerini ýalan diýip atlandyrdy.