Maýa goýujylar Gyrgyzystany ynamly hyzmatdaş hökmünde görüp başladylar – prezident

Gyrgyzystanyň prezidenti Sadyr Žaparow soňky bäş ýylda ýurtda işewürlik gurşawynyň we maýa goýum ikliminiň gowulaşandygyny beýan etdi. Döwlet başlygy bu barada şu gün Bişkekde geçirilen respublika maslahatynda aýdyp geçdi.

Žaparowyň sözlerine görä, hem içerki, hem daşarky maýa goýujylar iri sebitleýin taslamalary durmuşa geçirmekde döwleti uzak möhletli we ynamly hyzmatdaş hökmünde görüp başladylar. Ol hususy emlägiň we maýa goýujylaryň kanuny bähbitleriniň goragyna degişli mehanizmleriň güýçlendiriljekdigini aýtdy.

Prezident amatly maýa goýum ikliminiň döredilmeginiň ýerine ýetiriji, kanun çykaryjy we kazyýet häkimiýetiniň umumy jogapkärçiligidigini nygtady. Maýa goýujylar jedal ýüze çykanda öz hukuklaryny kazyýete çenli we kazyýet arkaly ynamly gorap biljekdiklerine ynanmalydygyny belledi.