Инвесторлар Қырғызстанды сенімді серіктес ретінде қарастыра бастады – президент

Қырғызстан Президенті Садыр Жапаров соңғы бес жылда елде бизнес ортасы мен инвестициялық ахуалдың жақсарғанын мәлім етті. Мемлекет басшысы бұл туралы бүгін Бішкекте өткен республикалық кеңесте айтты.

Жапаровтың айтуынша, ішкі және сыртқы инвесторлар ірі өңірлік жобаларды жүзеге асыру барысында мемлекетті ұзақмерзімді және сенімді серіктес ретінде қабылдай бастаған. Ол жеке меншікті және инвесторлардың заңды мүдделерін қорғау тетіктерінің күшейтілетінін айтты.

Президент қолайлы инвестициялық ахуалды қалыптастыру атқарушы, заң шығарушы және сот билігінің бірлескен жауапкершілігі екенін атап өтті. Инвесторлар келіспеушілік туындаған жағдайда өз құқықтарын сотқа дейін және сот арқылы сенімді қорғай алатындарына сенуі тиіс.