SOCAR Türkiýe halkara banklardan 1,6 milliard dollarlyk täzeden maliýeleşdirme çekdi

Azerbaýjan Döwlet nebit kompaniýasynyň (SOCAR) Türkiýedäki bölümi bolan «SOCAR Türkiýe» öňki karzlaryny has amatly şertlerde täzeden maliýeleşdirmek maksady bilen halkara banklardan 1,6 milliard ABŞ dollaryna deň möçberde bäş ýyllyk maliýeleşdirme çekdi. Report habar berişine görä, şertnama göz öňünde tutulan möçberden 1,8 esse köp teklif gelipdir, bu bolsa halkara maliýe bazarlarynyň gyzyklanmasyny görkezýär.

Maliýeleşdirme «First Abu Dhabi Bank» (FAB) we «Mizuho Bank»yň ýolbaşçylygynda amala aşyryldy; Ýewropany, Uzak Gündogary we Ýakyn Gündogary wekilçilik edýän jemi 22 bank gatnaşdy. Maglumata görä, SOCAR-yň kepilligi bilen üpjün edilen maliýeleşdirme ýyllyk SOFR + 230 baza nokady göterim derejesi esasynda berildi. Kompaniýanyň beýanatyna görä, göterim çykdajylary öňki karzlara we bazardaky meňzeş amallara seredeniňde pesdir.

SOCAR-yň prezidenti we «SOCAR Türkiýe»niň direksiýa geňeşiniň başlygy Röwşen Nejef, bankalaryň ýokary gyzyklanmasynyň kompaniýanyň global maliýe bazarlaryndaky ynamdarlygyny we SOCAR Toparynyň maliýe durnuklylygyna ynamy görkezýändigini aýtdy. Halkara bazarlardan çekilen serişdeler SOCAR Toparynyň likwidliligini goldamaga hyzmat eder. Täzeden maliýeleşdirme prosesinde «SOCAR Türkiýe»niň hukuk maslahatçylary «Vinson & Elkins RLLP» we «Omni Law Firm» boldy.