SOCAR Türkiyə beynəlxalq banklardan 1,6 milyard dollarlıq yenidənmaliyyələşmə cəlb edib

Azərbaycan Dövlət Neft Şirkətinin (SOCAR) Türkiyədəki törəməsi «SOCAR Türkiyə» əvvəlki kreditlərini daha əlverişli şərtlərlə yenidən maliyyələşdirmək məqsədilə beynəlxalq banklardan 1,6 milyard ABŞ dolları məbləğində beşillik maliyyələşmə cəlb edib. Report xəbər verir ki, sövdələşməyə nəzərdə tutulan məbləğdən 1,8 dəfə çox təklif daxil olub və bu, beynəlxalq maliyyə bazarlarının marağını göstərib.

Maliyyələşmə «First Abu Dhabi Bank» (FAB) və «Mizuho Bank»ın rəhbərliyi ilə həyata keçirilib, Avropa, Uzaq Şərq və Yaxın Şərqi təmsil edən ümumilikdə 22 bank iştirak edib. Məlumata görə, SOCAR-ın zəmanəti ilə təmin olunan maliyyələşmə illik SOFR + 230 baza bəndi faiz dərəcəsi əsasında verilib. Şirkətin açıqlamasına görə, faiz xərcləri əvvəlki kreditlərə və bazardakı oxşar əməliyyatlara nisbətən aşağıdır.

SOCAR prezidenti və «SOCAR Türkiyə»nin İdarə Heyətinin sədri Rövşən Nəcəf bildirib ki, bankların yüksək marağı şirkətin qlobal maliyyə bazarlarındakı etibarlılığını və SOCAR Qrupunun maliyyə dayanıqlılığına inamı əks etdirir. Beynəlxalq bazarlardan cəlb olunan vəsait SOCAR Qrupunun likvidliyinin dəstəklənməsinə xidmət edəcək. Hüquqi məsləhətçilər «Vinson & Elkins RLLP» və «Omni Law Firm» olub.