PETRONAS Tehnologiýa uniwersiteti türkmen mugallymlary we talyplary üçin hünär kämilleşdiriş okuwyny geçirýär

19-22-nji oktýabr aralygynda Malaýziýanyň PETRONAS Tehnologiýa uniwersitetiniň professory tarapyndan Ýagşygeldi Kakaýew adyndaky Halkara nebit we gaz uniwersitetiniň energetika we inženerçilik desgalary fakultetiniň talyplary hem-de ýaş mugallymlary üçin onlaýn görnüşde hünär kämilleşdiriş okuw sapaklary geçirilýär.

«Energetika ulgamynyň seljermesi» atly ugra bagyşlanan okuw sapaklarynda gatnaşyjylara häzirki zaman innowasion tehnologiýalar hem-de bu ugurda ulanylýan täze usullar barada giňişleýin we döwrebap maglumatlar berilýär. Okuwlaryň netijeleri boýunça diňleýjilere PETRONAS Tehnologiýa uniwersitetiniň ýörite şahadatnamalary gowşurylar. Okuwlar uniwersitetiň, «PETRONAS Carigali (Turkmenistan) Sdn Bhd» kompaniýasynyň we PETRONAS Tehnologiýa uniwersitetiniň arasynda baglaşylan özara düşünişmek hakyndaky Ähtnamanyň çäklerinde guraldy.

Taraplar bu resminama esasynda birnäçe ýyldan bäri ylym we bilim ulgamlarynda netijeli hyzmatdaşlyk edýärler. Türkmen ýokary okuw mekdepleriniň talyplary we ýaş mugallymlary her ýyl tomusky okuw-önümçilik tejribesini PETRONAS Tehnologiýa uniwersitetinde geçýärler. Mundan başga-da, 2026–2027-nji okuw ýylynda PETRONAS professor-mugallymlarynyň ýolbaşçylygynda uzak aralykdan we ýüzbe-ýüz görnüşde birnäçe tapgyrly okuw sapaklary geçirmek meýilleşdirilýär; bu okuwlar nebitgaz pudagyny ösdürmek, emeli aňy ornaşdyrmak, himiýa we gaýtadan işlemek ýaly ugurlary öz içine alar.