Türkmenistanyň Ýaragly Güýçleriniň harby bölüminde täze binalar we desgalar toplumy açyldy

Türkmenistanyň Prezidenti, Ýaragly Güýçleriniň Belent Serkerdebaşysy goşun generaly Serdar Berdimuhamedow Ýaragly Güýçleriniň harby bölüminiň täze binalar we desgalar toplumynyň açylyş dabarasyna gatnaşdy. Habarda Milli Lider Gahryman Arkadagymyz tarapyndan başlanan harby özgertmeleriň Prezidentimiz Serdar Berdimuhamedowyň baştutanlygynda üstünlikli dowam etdirilýändigi bellenýär.

Toplumyň düzümine dolandyryş binasy, nyzam meýdançasy, esger naharhanasy, esger ýatakhanalary, lukmançylyk nokady, açyk sport meýdançasy, päsgelçilik ýodasy, awtoulaglar üçin duralga we gulluk, hojalyk binalary girýär. Goranmak ministri B. Gündogdyýew täze binalaryň açylmaga taýýardygy barada döwlet Baştutanymyza hasabat berdi. Dabarada Döwlet senasy ýaňlandy we toý bagy kesildi.

Döwlet Baştutany dolandyryş binasynda döwrebap ýaraglar we uçarmansyz uçýan enjamlar bilen tanyşdy, lukmançylyk nokadynda we esger ýatakhanalarynda boldy. Habarda ýatakhanalarda ýyladyş we sowadyş ulgamlarynyň, harby geýimleriň we käbir serişdeleriň türkmen telekeçileri tarapyndan öndürilendigi hem-de Prezidentimize nepis türkmen halysy sowgat edilendigi bellenýär.