Gaşgadarýa welaýatynda 300 MW güýçli Günüň elektrik stansiýasy guruljak

Özbegistanyň Gaşgadarýa welaýatynda indiki ýyl 300 MW güýçli Günüň elektrik stansiýasynyň we 75 MW güýçli energiýa toplaýyş ulgamynyň ulanylmaga berilmegi meýilleşdirilýär. 250 mln dollar bahaly taslamany Masdar kompaniýasy durmuşa geçirer. Bu barada sebitiň sosial-ykdysady ösüşine bagyşlanan, Prezident Şawkat Mirziýoýewiň başlygyndaky mejlisde habar berildi.

Energetika infrastrukturasyny güýçlendirmek üçin Nişan we Kükdala etraplarynda iki iri podstansiýa gurmak üçin 70 mln dollar çekmek meýilleşdirilýär; olaryň hem indiki ýyl işe girizilmegi göz öňünde tutulýar. Şeýle hem Tolimarjan — Sogdiana ugry boýunça uzynlygy 245 km bolan elektrik geçiriş liniýasy üçin 150 mln dollar bölünip berildi we jogapkär adamlara taslamany indiki ýyl tamamlamak tabşyryldy.

Karşi etrabynda Hytaý hyzmatdaşy bilen amala aşyrylýan 45 MW güýçli galyndylardan elektrik öndürmek taslamasy tamamlanmak üstünde. Ýylyň ahyryna çenli Guzar, Şurtan, Mubarek, Dehkanabat we Nişanda alty senagat klasteri döredilmegi tabşyryldy. Gaşgadarýa erkin ykdysady zolagynyň şahamçalary Şurtanda, Mubarekde, Ýakkabagda we Kasanda açylar; infrastruktura üçin ilkibaşda 250 milyard som ugrukdyrylar.