Özbekistan we Russiýa AES gurluşygy üçin bilelikdäki kärhanalary ara alýar

Daşkentde Özbekistanyň kompaniýalary bilen bilelikde respublikada integrirlenen atom elektrik stansiýasy (AES) taslamasyny durmuşa geçirmek üçin bilelikdäki kärhanalary döretmek meselelerine bagyşlanan giň pudak konferensiýasy geçirildi. Çärä “Uzatom” agentliginiň we Rosatom döwlet korporasiýasynyň wekilleri, şeýle hem Özbekistanyň we Russiýanyň öňdebaryjy kompaniýalarynyň hünärmenleri gatnaşdy.

Duşuşykda ýerli kärhanalaryň AES gurluşygyna gatnaşygyny giňeltmek we senagat kooperasiýasyny ösdürmek meseleleri ara alyndy. Häzirki zaman atom stansiýalaryny gurmakda öňdebaryjy tehnologiýalary ulanmak, gurluş proseslerini kämilleşdirmek hem-de zerur materiallary ýerli öndürmek mümkinçilikleri göz öňünden geçirildi. Esasy üns ätiýaçlyk elektrik üpjünçilik ulgamlaryna ýerli gatnaşygy üpjün etmäge berildi.

Özbek we rus kompaniýalarynyň arasynda awtomatlaşdyrylan dolandyryş we radiasiýa gözegçilik ulgamlary, aýratyn şemallandyryş enjamlary, polimer turbalar we ýylylyk izolýasiýa materiallary boýunça hyzmatdaşlyk mümkinçilikleri seljerildi. Gatnaşyjylar bilelikdäki kärhanalary döretmek arkaly ýerli önümçiligi ösdürmegiň mümkindigini nygtadylar.