Türkmen talyby Ýaponiýanyň Tohoku uniwersitetinde bir ýyl okaýar

Oguz han adyndaky Inžener-tehnologiýalar uniwersiteti biotehnologiýa we ekologiýa fakultetiniň 3-nji ýyl talyby Suraý Baýryýewa talyplary alyşmak maksatnamasy boýunça Ýaponiýanyň öňdebaryjy ýokary okuw mekdepleriniň biri bolan Tohoku uniwersitetinde bir ýyllyk okuw geçýär.

Çeşmä görä, Suraý Ýaponiýanyň Tohoku sebitiniň Miýagi prefekturasynyň Sendaý şäherinde ýerleşýän uniwersitetiň Inženerçilik mekdebinde (School of Engineering) okaýar. Okuw döwründe hünär ugruna degişli dersleri bilen bir hatarda ylmy-barlag taslamalaryna hem gatnaşýar.

Maksatnamanyň amaly bölegi talyba alan bilimlerini halkara ylmy giňişlikde ulanmaga, öňdebaryjy barlag usullary bilen tanyşmaga we inženerçilik, biotehnologiýa we ekologiýa ulgamlaryndaky häzirki zaman çemeleşmeleri özleşdirmäge mümkinçilik berýär. Inženerçilik mekdebiniň maglumatlaryna görä, daşary ýurtly talyplaryň barlaghanalarda ylmy-barlaglara gatnaşmagy alyşmalar maksatnamasynyň esasy bölekleriniň biridir.