Erdogan türk döwletleriniň arasynda hyzmatdaşlygy güýçlendirmäge çagyrdy

Türkiýäniň Prezidenti Rejep Tayyip Erdogan türk dünýäsiniň umumy mümkinçiliklerini konkret netijelere öwürmäge we geljek nesillere has güýçli türk dünýäsini galdyrmaga çagyrdy. Türk döwletleriniň guramasynyň (TDG) 13-nji sammitine bagyşlanan makalasynda ol birligi berkitmäge çagyrdy. Bu barada Türkiýäniň Türkmenistandaky ilçihanasy habar berdi.

Ankarada geçiriljek sammit «Türk asyry: dilde, pikirde we işde birlik» şygary astynda geçiriler. Erdoganyň sözlerine görä, sammitde syýasat, ykdysadyýet, medeniýet we howpsuzlyk ugurlarynda hyzmatdaşlyga aýratyn üns berler. Türkiýe guramanyň nobatdaky başlyklygyny Azerbaýjandan kabul eder. Makalada ykdysady integrasiýa esasy ugur hökmünde görkezilýär; Hazar deňzi arkaly geçýän Orta koridor Aziýa bilen Ýewropanyň arasynda möhüm baglanyşyk hökmünde bellenilýär. Erdogan ulag infrastrukturasyny kämilleşdirmäge, söwda päsgelçiliklerini aradan aýyrmaga we energetika ugrunda hyzmatdaşlygy giňeltmäge çagyrdy.

Bilim we tehnologiýa ugrunda ol ýeke türk elipbiýi başlangyjyny goldamagy, uniwersitetler we alymlar arasyndaky baglanyşygy güýçlendirmegi we ýaşlaryň türk döwletlerinde okamak mümkinçiliklerini döretmegi nygtady. Ol suwgy intellekt döwründe türk dillerine mynasyp orun berilmelidigini aýtdy.