Türkmenistan Brýusselde Merkezi Aziýa–Ýewropa Bileleşiginiň forumyna gatnaşdy

31-nji oktýabrda Belgiýa Patyşalygynyň Brýussel şäherinde «Merkezi Aziýa – Ýewropa Bileleşigi: üýtgeýän dünýäde hyzmatdaşlygyň özgerişi» atly strategik institutlaryň ilkinji forumy geçirildi. Çäre Ýewropa Bileleşiginiň Merkezi Aziýa boýunça Ýörite wekiliniň edarasynyň hem-de Ýewropa Bileleşiginiň Howpsuzlyk meselelerini öwreniş institutynyň ýardam bermeginde guraldy.

Foruma Türkmenistanyň Daşary işler ministrliginiň geňeşçisi Batyr Niýazliýew we ilçi Sapar Pälwanow gatnaşdylar. Duşuşygyň esasy maksady bilermenler derejesindäki dialogy pugtalandyrmak we 2025-nji ýylyň aprelinde Samarkant şäherinde geçirilen ilkinji sammitiň netijeleri boýunça strategik hyzmatdaşlygy ösdürmek üçin anyk teklipleri taýýarlamakdy.

Forumda halkara howpsuzlygy, söwda-ykdysady hyzmatdaşlyk, ulag we energetika arabaglanyşygy, maýa goýumlaryny çekmek, sanlylaşdyrmak, bilim we jemgyýetçilik diplomatiýasy ele alyndy. Türkmen tarapy Hazarüsti halkara ulag geçelgesiniň ösdürilmegini, türkmen tebigy gazyny Ýewropa bazaryna ibermek mümkinçiliklerini we Türkmenbaşy Halkara deňiz portunyň ähmiýetini nygtady. Türkmenistanyň 2027-nji ýylda Merkezi Aziýa – Ýewropa Bileleşigi Ykdysady forumyny geçirmek baradaky başlangyjy hem bellenildi.