Кыргызстандагы 25 мектепке Старлинк терминалдары берилди

Кыргыз Республикасынын Министрлер Кабинетинин төрага орун басары Улан Маматканов өлкөнүн ар кайсы аймактарындагы 25 мектепке Старлинк терминалдарын берүү иш-чарасына катышты. Жабдык компания тарабынан акысыз берилип, ылдамдыгы жогорку спутниктик интернетке жетүү үчүн билим берүү мекемелерине өткөрүлүп берилди.

Демилге санариптик инфраструктураны өнүктүрүү жана алыстагы, жетүү кыйын конуштардагы билим берүү, медицина жана башка социалдык объекттерди заманбап байланыш кызматтары менен камсыз кылуу боюнча мамлекеттик саясаттын бир бөлүгү. Иш Президент Садыр Жапаровдун жетекчилиги астында жана Министрлер Кабинетинин Төрагасы, Президенттин Администрациясынын жетекчиси Адылбек Касымалиевдин түз колдоосу менен жүргүзүлүүдө, деп белгиледи Министрлер Кабинети. 2025-жылы өлкөдө спутниктик интернетти киргизүү боюнча пилоттук долбоор ишке кирип, анын жыйынтыгы боюнча спутниктик байланышты туруктуу колдонууга шарт түзгөн ченемдик укуктук актылар кабыл алынган.

Улан Маматканов мамлекеттин басымдуу милдеттеринин бири санариптик теңсиздикти азайтуу жана жашаган жерине карабастан сапаттуу билим алуу үчүн тең мүмкүнчүлүктөр түзүү экенин баса белгиледи. «Биздин максат — шаарда же алыскы айылда жашаганына карабастан, ар бир окуучу заманбап билим берүү ресурстарын колдоно алышы үчүн шарт түзүү», — деди ал. Жабдыкты натыйжалуу пайдаланууга жана санариптик технологияларды күнүмдүк окуу процессине киргизүүгө өзгөчө көңүл бурулду.