Gresiýa, Günorta Kipr we Ysraýyl Türkiýe-Liwiýa memorandumyna garşy birleşdi

Atinadaky duşuşykda Günorta Kipriň, Gresiýanyň we Ysraýylyň gatnaşyjylary Türkiýe-Liwiýa ylalaşyk memorandumynyň “bikanundygyny” öňe sürdüler we sözde “Kipr Respublikasynyň suwereniteti, garaşsyzlygy we ýer bitewiligi” ugrundaky goldawyny täzeden tassykladylar. Muny Haravgi gazetiniň Günorta Kipriň Goranyş ministrligine salgylanyp beren habarynda aýdylýar.

Duşuşykda üç ýurduň arasynda goranyş hyzmatdaşlygyny, tehnologiýa alyş-çalyşyny we goranyş senagatynda hyzmatdaşlygy giňeltmek we güýçlendirmek meselesi ele alyndy. Bilelikde goranyş ulgamlaryny işläp düzmek we öndürmek mümkinçilikleri hem-de aýratyn işçi topary döretmek barada gürrüň edildi.

Energetika ugrundaky hyzmatdaşlyk, möhüm infrastrukturalaryň, energetika koridorlarynyň we deňizde hereketiň erkinliginiň goralmagy hem ünsüň merkezinde boldy. Duşuşyk çäginde Günorta Kipriň wekiliýeti Gresiýa we Ysraýyl wekilçilikleri bilen ikitaraplaý gepleşikler geçirdi.