Özbegistanda 1602 MVA kuwwatly «Halka» podstansiýasy işe girizildi

Özbegistanda 7-nji noýabrda 500 kV naprýaženiýaly we 1602 MVA kuwwatly täze «Halka» podstansiýasyna togy berildi. Obýekt Daşkent we Daşkent welaýatynyň bir böleginde elektrik üpjünçiliginiň ygtybarlylygyny ýokarlandyrmaga we bar energetika ulgamlaryndaky ýüküni azaltmaga gönükdirilendir.

Podstansiýanyň işe girizilmegi paýtagtda we golaý etraplarda elektrik ýüklerini täzeden paýlamaga mümkinçilik berer. Berlen maglumata görä, Daşkent ýylylyk elektrik stansiýasyndaky ýükün azalmagy sebäpli, stansiýada ýangyç hökmünde mazutdan ýüz öwürmek mümkin bolar. Bu bolsa atmosferä goýberilýän zyýanly maddalaryň mukdaryny azaldyp, ekologiki ýagdaýy gowulandyrar.

Taslamanyň umumy bahasy 171,4 million dollar bolup, ol Dünýä banky gatnaşmagynda durmuşa geçirildi. Taslamanyň çäklerinde 220 kV naprýaženiýaly 213 km we 500 kV naprýaženiýaly 72 km howa elektrik geçiriş liniýalary guruldy; täze ýokary naprýaženiýaly liniýalaryň umumy uzynlygy 285 km boldy. Döredilen infrastruktura bitewi energetika ulgamynda geçiriş mümkinçiliklerini giňelder. Täze obýektleri ulgama doly integrasiýa etmek boýunça soňky işler dowam edýär.