Gazagystanda ýumurtga hüjeýjesiniň ýadrosyny çalyşmak usuly bilen ilkinji çaga dünýä indi

Gazagystanda ilkinji gezek ýumurtga hüjeýjesiniň ýadrosyny çalyşmak (MAT) usuly arkaly çaga dünýä indi. Bu ýurdy çylşyrymly reproduktiw tehnologiýany klinika derejesinde ulanan dünýäniň az sanly ýurtlarynyň hataryna goşdy. Bu usul adatça “üç ene-ataly çaga” diýlip atlandyrylýar.

Bu usul bilen çaga dünýä getiren ilkinji gazagystanly aýal 43 ýaşda. Dört ýyl dowamynda çaga göterjek bolup, birnäçe gezek EKO geçirse-de, netije almandyr. Hünärmenler muny ýaş ulaldygyça ene hüjeýjesindäki energiýa çeşmesi hasaplanýan mitohondriýalaryň gowşamagy bilen baglanyşdyrýarlar; bu ýagdaýda embrionyň ösüşi başlangyç tapgyrda togtap biler.

Prosedura Almatydaky “Persona” klinikasynyň resmi geňeşçi embriology, ABŞ-nyň Oregon ştatynyň Portland şäherinden professor Şuhrat Mitalipow we Milli Ylymlar akademiýasynyň akademigi professor Wýaçeslaw Lokşin tarapyndan bilelikde amala aşyryldy. Ene bilen çaganyň ýagdaýy gowy. Taslamadaky başga bir aýalyň dogurmak wagty hem ýakynlaşýar. Lokşin usulyň häzirlikçe eksperimental ugur bolup galjagyny we dünýä inen çagalaryň saglygynyň köp ýyllap yzarlanjagyny aýtdy. Çaganyň genetik materialynyň 99,9 göterimi biologik ene-atasyna degişlidir.