Qazaxıstanda yumurta hüceyrəsinin nüvəsinin əvəzlənməsi ilə ilk dəfə körpə dünyaya gəldi

Qazaxıstanda ilk dəfə yumurta hüceyrəsinin nüvəsinin əvəzlənməsi (MAT) üsulu ilə körpə dünyaya gəlib. Bu hadisə ölkəni mürəkkəb reproduktiv texnologiyanı klinik səviyyədə tətbiq edən az sayda dövlətin sırasına daxil edib. Üsul ümumi dildə “üç valideynli uşaq” adlanır.

Bu üsulla uşaq dünyaya gətirən ilk qazaxıstanlı qadın 43 yaşındadır. Dörd il uşaq sahibi olmağa çalışan qadın bir neçə dəfə EKO etdirsə də, nəticə əldə edə bilməmişdi. Mütəxəssislər bunu yaşla birlikdə ananın hüceyrəsindəki enerji mənbəyi sayılan mitoxondriyaların zəifləməsi ilə əlaqələndirirlər; bu halda embrionun inkişafı erkən mərhələdə dayana bilər.

Prosedur Almatıdakı “Persona” klinikasının rəsmi məsləhətçi embriloqu, ABŞ-ın Oreqon ştatının Portlend şəhərindən professor Şuxrat Mitalipov və Milli Elmlər Akademiyasının akademiki professor Vyaçeslav Lokşin tərəfindən birgə həyata keçirilib. Ana və körpənin vəziyyəti yaxşıdır. Layihədəki başqa bir qadının doğum vaxtı da yaxınlaşır. Lokşin bildirib ki, üsul hələlik eksperimental istiqamət olaraq qalacaq və doğulan uşaqların sağlamlığı uzun illər izlənəcək. Körpənin genetik materialının 99,9 faizi bioloji valideynlərinə məxsusdur.