Qozogʻistonda tuxum hujayrasi yadrosini almashtirish usuli bilan birinchi chaqaloq tugʻildi

Qozogʻistonda birinchi marta tuxum hujayrasi yadrosini almashtirish (MAT) usuli yordamida chaqaloq dunyoga keldi. Bu voqea mamlakatni murakkab reproduktiv texnologiyani klinik darajada qoʻllagan kam sonli davlatlar qatoriga qoʻshdi. Usul xalq orasida “uch ota-onali bola” deb ataladi.

Bu usul bilan farzand koʻrgan birinchi qozogʻistonlik ayol 43 yoshda. U toʻrt yil davomida homilador boʻlishga urinib, bir necha marta EKO oʻtkazgan, ammo natija boʻlmagan. Mutaxassislar buni yosh oshgani sayin ona hujayrasidagi energiya manbai hisoblangan mitoxondriyalarning susayishi bilan bogʻlaydi; bunday holatda embrion rivojlanishi dastlabki bosqichda toʻxtab qolishi mumkin.

Jarayonni Almatydagi “Persona” klinikasining rasmiy maslahatchi embriologi, AQShning Oregon shtatidagi Portlend shahridan professor Shuxrat Mitalipov hamda FA akademigi professor Vyacheslav Lokshin birgalikda amalga oshirdi. Ona va chaqaloqning ahvoli yaxshi. Loyihadagi yana bir ayolning tugʻish vaqti ham yaqinlashmoqda. Lokshinning aytishicha, texnologiya hozircha eksperimental yoʻnalish boʻlib qoladi va tugʻilgan bolalarning sogʻligi uzoq yillar kuzatiladi. Chaqaloq genetik materialining 99,9 foizi biologik ota-onasiga tegishli.