CASA-1000 ýurtlary Bişkekde kommersiýa işine taýýarlygy maslahat etdi

Bişkekde 2026-njy ýylyň 7-9 oktýabr senelerinde CASA-1000 taslamasy boýunça bilelikdäki işçi toparyň mejlisi geçirildi. Mejlisde Gyrgyzystan, Täjigistan, Pakistan we Owganystan wekilleri, şeýle-de taslamanyň halkara hyzmatdaşlary gatnaşdy. Bu barada Gyrgyzystanyň Milli elektrik torunyň (NESK) ýaýradan maglumatynda aýdyldy. Gyrgyzystan öz çäklerindäki gurluş işleriniň tamamlanandygyny tassyklady.

Taraplar taslamanyň häzirki ýagdaýyny, gatnaşyjy ýurtlardaky gurluş barşyny we energetika infrastrukturasynyň tehniki we kommersiýa taýýarlygyny seredip çykdylar. Täjigistanyň Energetika we suw serişdeleri ministrliginiň maglumatyna görä, gatnaşyjylar hemişelik tok özgerdiji stansiýalary üçin operatory saýlamagy, monitoringi guramagy we galan işleri maliýeleşdirmegi hem maslahat edipdirler. Owganystanyň wekilçiligi galan işleri tamamlamak üçin goşmaça serişdeleriň zerurdygyny habar berdi. Bütindünýä banky wekilleri bu barada mümkinçilikleri öwrenjekdiklerini aýtdy.

Üç günlük mejlisiň netijesinde infrastrukturanyň doly işlemegi we taslamanyň kommersiýa ulanmagyna geçmegi üçin zerur bolan bilelikdäki indiki ädimler kesgitlendi. Taslamanyň geçiriş kuwwaty 1300 MW bolup, onuň 1000 MW-y Pakistana, 300 MW-y Owganystana niýetlenen.