CASA-1000 davlatlari Bishkekda tijorat ishga tushirishga tayyorgarlikni muhokama qildi

Bishkekda 2026-yil 7-9 oktyabr kunlari CASA-1000 loyihasi boʻyicha birgalikdagi ishchi guruhning yigʻilishi boʻlib oʻtdi. Unda Qirgʻiziston, Tojikiston, Pokiston va Afgʻoniston vakillari hamda loyihaning xalqaro hamkorlari ishtirok etdi. Bu haqda Qirgʻiziston Milliy elektr tarmogʻi (NESK) xabar berdi. Qirgʻiziston oʻz hududidagi qurilish ishlarini yakunlaganini tasdiqladi.

Tomonlar loyihaning joriy holatini, ishtirokchi davlatlardagi qurilish jarayonini hamda energetika infratuzilmasining texnik va tijorat tayyorgarligini koʻrib chiqdi. Tojikiston Energetika va suv resurslari vazirligi maʼlumotiga koʻra, ishtirokchilar doimiy tok oʻzgartirish stansiyalari operatorini tanlash, monitoringni tashkil etish hamda qolgan ishlarni moliyalashtirishni ham muhokama qilgan. Afgʻoniston delegatsiyasi qolgan ishlarni yakunlash uchun qoʻshimcha mablagʻ zarurligini bildirgan. Jahon banki vakillari esa bu borada imkoniyatlarni koʻrib chiqishini aytgan.

Uch kunlik yigʻilish yakunida infratuzilmaning toʻliq ishlashi va loyihaning tijorat ekspluatatsiyasiga oʻtishi uchun zarur boʻlgan birgalikdagi keyingi harakatlar belgilandi. Loyihaning uzatish quvvati 1300 MVt boʻlib, shundan 1000 MVt Pokistonga, 300 MVt Afgʻonistonga moʻljallangan.