Özbegistanyň Prezidenti daşary ýurt maýadarlary bilen täze energetika taslamalaryny maslahatlaşdy

Prezident Şawkat Mirziýoýew Saud Arabystany, Türkiýe, BAE, Azerbaýjan we Angliýa kompaniýalary bilen maýa goýum taslamalaryny durmuşa geçirmek meselelerini ara alyp maslahatlaşdy. Saud kompaniýasy ACWA-nyň dolandyryş geňeşiniň başlygy Muhammed Abunaýan bilen duşuşykda hyzmatdaşlygy giňeltmek we bilelikdäki taslamalary çaltlaşdyrmak meseleleri gözden geçirildi. Saud kompaniýalarynyň Özbegistana, esasan-da «ýaşyl» energetika, infrastruktura we ösen tehnologiýalara maýa goýup durandygy bellenildi.

Türkiýäniň Cengiz Holding kompaniýasynyň dolandyryş geňeşiniň başlygy Mehmet Çengiz bilen duşuşykda energetika, geologiýa we infrastruktura boýunça hyzmatdaşlyk ara alyndy. Ýylylyk elektrik stansiýalarynyň gurluşygy we paýlaýjy elektrik ulgamlarynyň modernizasiýasy hem gözden geçirildi. Özbegistan bilen Türkiýäniň arasyndaky söwda dolanyşygynyň ösendigi bellenildi. Prezident şeýle hem Azerbaýjanyň SOCAR kompaniýasynyň prezidenti Rowşan Nejepi we British Petroleum kompaniýasynyň uly wise-prezidenti Jovanni Kristofoli bilen duşuşdy. Ustýurt platosyndaky uglewodorod ýataklaryny özleşdirmek we BP-niň taslamadaky gatnaşygy ara alyndy.

Masdar we AMEA Power kompaniýalarynyň ýolbaşçylary Muhammed Jamil Al Ramahi we Huseýin Al Nowaýs bilen duşuşykda BAE bilen dinamiki strategik hyzmatdaşlyk bellenildi. Ýylyň başyndan bäri özara söwda göwrümi 40 göterim artdy. Gepleşikleriň netijesinde ýaşyl energetika, infrastruktura, senagat hyzmatdaşlygy, turizm we hyzmat ulgamlary boýunça taslamalary çaltlaşdyrmak we giňeltmek barada ylalaşyga gelindi.