Eýran we Ermenistan strategik resminama taýýarlar - Pezeşkiýan mälim etdi

Eýran we Ermenistan ikitaraplaýyn strategik resminamany taýýarlamak, şeýle hem ykdysadyýet we tranzit gatnaşyklary ugrunda sebitdäki hyzmatdaşlygy ösdürmek barada ylalaşdylar. Eýranyň Prezidenti Massud Pezeşkiýan Ermenistana saparyň netijelerini düşündirip, muny habar berdi. Maglumaty “Pars Today” ýaýratdy.

Pezeşkiýanyň sözlerine görä, Erewanda Ermenistanyň premýer-ministri Nikol Paşinýan bilen duşuşykda ikitaraplaýyn gatnaşyklar we geljek döwür üçin meýilnamalar ara alnyp maslahatlaşyldy. Ylalaşyga laýyklykda, iki ýurduň hünärmenleri bilelikdäki strategik resminama üçin zerur esaslary emele getirmek maksady bilen hünärmen duşuşyklaryny geçirerler.

Pezeşkiýan ulag we tranzit ýollaryny ösdürmegi sebitdäki hyzmatdaşlygyň esasy ugurlarynyň biri hökmünde belledi. Onuň pikiriçe, sebit ýurtlarynyň mümkinçilikleriniň Ýewropa, Pars aýlagyna, Owganystana we Hindistana uzanýan ýollar bilen baglanyşdyrylmagy täze mümkinçilikler döredip biler.