İran və Ermənistan strateji sənəd hazırlayacaq - Pezeşkian açıqladı

İran və Ermənistan ikitərəfli strateji sənədin hazırlanması, eləcə də iqtisadiyyat və tranzit əlaqələri sahəsində regional əməkdaşlığın inkişafı barədə razılığa gəliblər. İran Prezidenti Məsud Pezeşkian Ermənistana səfərinin nəticələrini şərh edərkən bunu bildirib. Məlumat “Pars Today” tərəfindən yayılıb.

Pezeşkianın sözlərinə görə, İrəvanda Ermənistanın baş naziri Nikol Paşinyanla görüşdə ikitərəfli münasibətlər və qarşıdakı dövr üçün planlar müzakirə olunub. Razılaşmaya əsasən, iki ölkənin ekspertləri birgə strateji sənədin hazırlanması üçün zəruri əsasları formalaşdırmaq məqsədilə peşəkar görüşlər keçirəcəklər.

Pezeşkian nəqliyyat və tranzit marşrutlarının inkişafını regional əməkdaşlığın əsas istiqamətlərindən biri kimi qeyd edib. Onun fikrincə, bölgə ölkələrinin imkanlarının Avropaya, Fars körfəzinə, Əfqanıstana və Hindistana uzanan marşrutlarla əlaqələndirilməsi yeni imkanlar yarada bilər. O, İran, Ermənistan və Gürcüstanın ortaq imkanlarını da vurğulayıb.