ACWA Power 2027-nji ýylda Özbegistana 3,5 milliard dollar maýa goýar

Özbegistanyň Prezidenti Şowkat Mirziýoýew 16-njy oktýabrda ýangyç-energetika pudagynyň Maýa goýum geňeşiniň agzalary bilen bir hatar duşuşyk geçirdi. Olaryň birinde Saud Arabystanynyň ACWA Power kompaniýasynyň ýolbaşçysy Muhammet Abunaýan gatnaşdy.

Abunaýan O'zbekiston 24 telekanalyna beren interwýusynda döwlet ýolbaşçysynyň energetika pudagynyň ösüş maksatlary we maýa goýumlar barada çykyşynyň duşuşyk gatnaşyjylaryny «ruhlandyrandygyny» aýtdy. Duşuşykda ACWA Power 1,5 milliard dollarlyk şertnamany baglaşandygy mälim edildi. Taslama elektrik energiýasyny töwerek sagat öndürmäge niýetlenendir. Abunaýanyň sözlerine görä, 1 GW kuwwatly toplum Merkezi Aziýada şeýle görnüşli ilkinji taslama bolar. Kompaniýa, şeýle hem, 2027-nji ýylda Özbegistana goşmaça 3,5 milliard dollar gönüden-göni maýa goýmagy kabul etdi.

Abunaýan, noýabr aýynda 50-den gowrak Saud kompaniýasynyň wekilleriniň goşulan telekeçiler toparynyň Özbegistana sapary garaşylýandygyny aýtdy. Topar senagat, logistika we oba hojalygy ulgamlarynda hyzmatdaşlyk taslamalary üstünde işleýär. Abunaýan Saud Arabystanynyň Özbegistana häzirki wagta çenli 26 milliard dollardan gowrak maýa goýandygyny belläp, ýurduň ykdysady ösüşine goşant goşmaga taýyndygyny aýtdy.