ACWA Power 2027-yilda Oʻzbekistonga 3,5 mlrd dollar investitsiya kiritadi

Oʻzbekiston Respublikasi Prezidenti Shavkat Mirziyoyev 16-oktabr kuni yoqilgʻi-energetika sohasi Investitsiya kengashi ishtirokchilari bilan bir qator uchrashuvlar oʻtkazdi. Ulardan birida Saudiya Arabistoniyasining ACWA Power kompaniyasi rahbari Muhammad Abunayyan ishtirok etdi.

Abunayyan «Oʻzbekiston 24» telekanaliga bergan intervyusida davlat rahbarining energetika tarmogʻini rivojlantirish maqsadlari va investitsiyalar haqidagi nutqi uchrashuv ishtirokchilarini «ilhomlantirgani»ni aytdi. Uchrashuv davomida ACWA Power 1,5 mlrd dollarlik shartnoma imzolagani maʼlum qilindi. Loyiha elektr energiyasini kecha-kunduz ishlab chiqarishga moʻljallangan. Abunayyanning soʻzlariga koʻra, 1 GVt quvvatli majmua Markaziy Osiyoda bunday turdagi birinchi loyiha boʻladi. Kompaniya, shuningdek, 2027-yilda Oʻzbekistonga yana 3,5 mlrd dollar toʻgʻridan-toʻgʻri investitsiya kiritishni kelishib olgan.

Abunayyan noyabr oyida 50 dan ortiq Saudiya kompaniyasi vakillarini oʻz ichiga olgan biznes-delegatsiyaning Oʻzbekistonga tashrifi kutilayotganini aytdi. Delegatsiya sanoat, logistika va qishloq xoʻjaligi sohalarida hamkorlik loyihalari ustida ishlayotgani qayd etildi. Abunayyan Saudiya Arabistoni Oʻzbekistonga hozirgacha 26 mlrd dollardan ortiq investitsiya kiritganini eslatib, mamlakat iqtisodiyotini rivojlantirishga hissa qoʻshishga tayyor ekanini bildirdi.