Demirgazyk Makedoniýa ulag infrastrukturasyna 5-6 milliard ýewro maýa goýýar

Premýer-ministriň orunbasary we Ulag ministri Aleksandar Nikoloski Demirgazyk Makedoniýanyň 8-nji we 10-njy Pan-Ýewropa koridorlaryndaky infrastrukturany ösdürmek maksady bilen 5-den 6 milliard ýewrä çenli maýa goýandygyny mälim etdi. Ol bu sözlerini sebitdäki ERNO tory bilen berlen interwýuda aýtdy.

Nikoloskiniň sözlerine görä, bu iki koridor Demirgazyk Makedoniýanyň çäklerinde kesişýär we bu ýurt üçin möhüm geografiki artykmaçlyk döredýär. 8-nji koridor gündogar-günbatar, 10-njy koridor bolsa demirgazyk-günorta ugrunda uzalýar. Günorta-gündogar Ýewropada iki Pan-Ýewropa koridorynyň kesişýän ýeke-täk ýurdunyň Demirgazyk Makedoniýa bolandygyny belleýän ministr, bu ýagdaýyň sebit ulag we tranzit daşaýyş üçin uly mümkinçilikler döredýändigini nygtady.

Nikoloski infrastruktura maýalaşdyrmalarynyň ýurduň umumy içki önümi bilen deňeşdirilende örän ýokary derejä ýetendigini aýtdy. Demirgazyk Makedoniýanyň sebit tranzit ýoly hökmünde bäsleşiklilik ukybyny ýokarlandyrmagy maksat edinýändigini belleýän ministr, infrastruktura işleriniň Ýewropa Komissiýasy, Ýewropa Maýa goýum banky we Ýewropa Dikeldiş we ösüş banky ýaly halkara guramalar tarapyndan ýokary baha berilendigini belledi.