Özbegistan Mersin, Riga we Bagdat ugurlaryna blok otlylaryny işe salmagy göz öňünde tutýar

Özbegistan Daşkent — Mersin, Daşkent — Riga we Daşkent — Bagdat ugurlarynda blok otlylaryny işe salmak mümkinçiligini gözden geçirýär. UzDaily habaryna görä, bu mesele Özbegistanyň Söwda-senagat palatasynyň başlygy Dawron Wahobow bilen “Özbegistan demir ýollary” AJ-niň dolandyryş geňeşiniň başlygy Zafar Narzullaýewiň arasyndaky duşuşykda ara alnypdyr.

Duşuşykda esasy üns telekeçiler üçin eksport-import amallaryny ýönekeşleşdirmäge, ýük daşamak logistikasyny kämilleşdirmäge we halkara demir ýol ugurlaryny ösdürmäge gönükdirildi. Gatnaşyjylar täze ugurlaryň ýeke logistika mehanizmi çäginde birleşdirilmegi mümkinçiligini hem gözden geçirdiler. Bu işewürlik üçin has durnukly üpjünçilik zynjyrlaryny döretmäge, ýük daşamagyň netijeliligini ýokarlandyrmaga we özbek kompaniyalarynyň halkara bazarlardaky mümkinçiliklerini giňeltmäge hyzmat etmegi çaklanylýar.

Taraplar duşuşygyň netijesi boýunça transport-logistika ulgamynda telekeçileriň meselelerini çözmek boýunça bilelikdäki işi dowam etdirmegi ylalaşdylar. Guramalaryň arasyndaky özara hyzmatdaşlygy pugtalandyrmak we telekeçilik üçin amatly şertleri döretmek hem aýratyn üns merkezinde boljak.