Shimoliy Makedoniya transport infratuzilmasiga 5-6 milliard yevro sarmoya kiritdi

Bosh vazir oʻrinbosari va transport vaziri Aleksandar Nikoloski Shimoliy Makedoniyaning 8- va 10-sonli Pan-Yevropa koridorlari boʻylab infratuzilmani rivojlantirish maqsadida 5 dan 6 milliard yevrogacha sarmoya kiritganini maʼlum qildi. U bu fikrlarini mintaqaviy ERNO tarmogʻiga bergan intervyusida bildirdi.

Nikoloskiyning aytishicha, ikki koridor Shimoliy Makedoniya hududida kesishadi, bu esa mamlakat uchun muhim geografik ustunlik yaratadi. 8-koridor sharq-gʻarb, 10-koridor shimol-janub yoʻnalishida choʻzilgan. U Janubi-Sharqiy Yevropada ikki Pan-Yevropa koridori kesishadigan yagona davlat Shimoliy Makedoniya ekanini taʼkidlab, bu mavqe mintaqaviy transport va tranzit tashish uchun katta imkoniyatlar ochishini qayd etdi.

Nikoloski infratuzilma sarmoyalari mamlakat yalpi ichki mahsulotiga nisbatan ancha yuqori darajaga yetganini bildirdi. Shimoliy Makedoniya mintaqaviy tranzit yoʻnalishi sifatida raqobatbardoshligini oshirishni maqsad qilganini aytgan vazir, infratuzilma ishlari Yevropa Komissiyasi, Yevropa investitsiya banki va Yevropa tiklanish va taraqqiyot banki kabi xalqaro tashkilotlar tomonidan yuqori baholanganini qayd etdi.