Өзбекстан Мерсин, Рига жана Багдад багыттарында блоктук поездерди карап жатат

Өзбекстан Ташкент — Мерсин, Ташкент — Рига жана Ташкент — Багдад багыттары боюнча блоктук поезддерди иштетүү мүмкүнчүлүгүн карап жатат. UzDaily басылмасынын маалыматынча, бул маселе Соода-өнөр жай палатасынын төрагасы Даврон Вахабов менен «Өзбекстан темир жолдору» АК башкармалыгынын төрагасы Зуфар Нарзуллаевдин жолугушуусунда талкууланган.

Жолугушууда ишкерлер үчүн экспорт-импорт операцияларын жөнөкөйлөтүүгө, жүк ташуу логистикасын өркүндөтүүгө жана эл аралык темир жол багыттарын өнүктүрүүгө негизги көңүл бурулган. Катышуучулар жаңы багыттарды бирдиктүү логистикалык механизм алкагында айкалыштыруу мүмкүнчүлүгүн да карап чыгышкан. Бул бизнес үчүн туруктуу жеткирүү чынжырларын түзүүгө, жүк ташуунун натыйжалуулугун жогорулатууга жана өзбек компанияларынын эл аралык рынокторундагы мүмкүнчүлүктөрүн кеңейтүүгө жардам берери күтүлүүдө.

Жолугушуунун жыйынтыгы боюнча тараптар транспорт-логистика тармагындагы ишкерлердин көйгөйлөрүн чечүү боюнча биргелешип иштөөнү улантууга макулдашты. Уюмдар ортосундагы өз ара аракеттенүүнү бекемдөө жана бизнес жүргүзүү үчүн ыңгайлуу шарттарды түзүү да өзүнчө көңүл бурулуучу багыт болот.