Türk kompaniýalary Akkuýu atom elektrik stansiýasynda paý almaga gyzyklanýar

Türk kompaniýalarynyň Russiýanyň maýadarlygy hasabyna Türkiýede gurulýan Akkuýu atom elektrik stansiýasy (AES) taslamasynda paý almaga gyzyklanma bildirendigini Russiýanyň Prezidenti Wladimir Putin aýtdy. Putin muny Russiýa-Afrika sammitiniň çäginde geçirilýän sergi bilen tanyşanda mälim etdi. AZERTAC-yň Moskwadan 28-nji oktýabrda berlen habaryna görä, maglumat şeýle berildi.

Putiniň sözlerine görä, stansiýanyň gurluşygyna jemi 25 milliard dollar maýa goýulýar we taslamany maliýeleşdirmegi doly ýagdaýda Russiýa tarapy üpjün edýär. “Biz stansiýany gurýarys, oňa eýelik edýäris we ulanýarys. Emma häzirki wagtda Türkiýede bu prosesiň gatnaşyjysy bolmak isleýän we paýyň bir bölegini satyn almaga taýyn kompaniýalar hem bar. Biz muny diňe goldaýarys”, – diýip, ol belledi.

AES Türkiýäniň günorta kenarynda iki ýurduň arasynda gol çekilen hökümetara ylalaşyga laýyklykda gurulýar. Taslamany Russiýanyň “Rosatom” döwlet korporasiýasynyň düzümine girýän “Akkuyu Nuclear” kompaniýasy amala aşyrýar. Stansiýa her biri 3+ nesil VVER-1200 görnüşli reaktor bilen üpjün edilen dört energiýa blokyndan ybarat bolar. Her bir blokuň kuwwaty 1200 MW, umumy gurnalan kuwwat bolsa 4800 MW bolar.