Turk kompaniyalari Akkuyu atom elektr stansiyasida ulush olishga qiziqmoqda

Turk kompaniyalarining Rossiya investitsiyalari hisobiga Turkiyada qurilayotgan Akkuyu atom elektr stansiyasi (AES) loyihasida ulush olishga qiziqish bildirgani Rossiya Prezidenti Vladimir Putin tomonidan maʼlum qilindi. Putin buni Rossiya-Afrika sammiti doirasida oʻtkazilayotgan koʻrgazmani koʻzdan kechirish vaqtida aytdi. AZERTAC xabariga koʻra, bu haqda Moskvadan 28-oktyabrda xabar berilgan.

Putinning soʻzlariga koʻra, stansiya qurilishiga umumiy hisobda 25 milliard dollar investitsiya yotqizilgan va loyihani moliyalashtirishni toʻliq Rossiya tomoni taʼminlaydi. “Biz stansiyani quramiz, unga egalik qilamiz va uni ishlatamiz. Lekin hozirda Turkiyada bu jarayonning ishtirokchisiga aylanishni xohlaydigan va ulushning bir qismini sotib olishga tayyor kompaniyalar ham bor. Biz buni faqat qoʻllab-quvvatlaymiz”, – dedi u.

AES Turkiyaning janubiy qirgʻogʻida ikki davlat oʻrtasida imzolangan hukumatlararo bitim asosida qurilmoqda. Loyihani Rossiyaning “Rosatom” davlat korporatsiyasi tarkibiga kiruvchi “Akkuyu Nuclear” kompaniyasi amalga oshirmoqda. Stansiya har biri 3+ avlod VVER-1200 turidagi reaktor bilan jihozlangan toʻrt energiya blokidan iborat boʻladi. Har bir blokning quvvati 1200 MVt, stansiyaning umumiy oʻrnatilgan quvvati esa 4800 MVt boʻladi.