Gyrgyzystan we Özbegistan elektrik energiýasy üpjünçiligi meselelerini maslahatlaşdy

Gyrgyzystanyň energetika ministri Altynbek Rysbekow Bişkekde Özbegistanyň energetika ministri Şerzod Hodjaýew bilen duşuşdy. Ministrligiň habaryna görä, duşuşykda iki ýurduň arasyndaky energetika ulgamyndaky häzirki hyzmatdaşlygyň ýagdaýy we ony mundan beýläk ösdürmegiň geljekki mümkinçilikleri maslahatlaşyldy.

Taraplar aýratyn-da elektrik energiýasynyň özara üpjünçiligine we tranzitine, Merkezi Aziýanyň birleşen energetika ulgamynyň durnukly işlemegine we güýz-gyş döwri üçin bilelikdäki çäreleriň utgaşdyrylmagyna üns berdiler.

Duşuşykdan soň ministrler energetika pudagyndaky hyzmatdaşlygy has giňeltmek, özara peýdaly başlangyçlary öňe sürmek we iki ýurduň arasyndaky strategiki hyzmatdaşlygy pugtalandyrmak borçnamasyny beýan etdiler.