Кыргызстан менен Өзбекстан электр энергиясын жеткирүү маселелерин талкуулашты

Кыргызстандын энергетика министри Алтынбек Рысбеков Бишкекте Өзбекстандын энергетика министри Шерзод Ходжаев менен жолукту. Министрликтин маалымдоосу боюнча, жолугушууда эки өлкөнүн энергетика тармагындагы кызматташтыгынын учурдагы абалы жана аны андан ары өнүктүрүүнүн келечеги талкууланды.

Тараптар өзгөчө электр энергиясын өз ара жеткирүүгө жана транзитке, Борбордук Азиянын бирдиктүү энергетикалык системасынын туруктуу иштешине, ошондой эле күз-кыш мезгилин ийгиликтүү өткөрүү үчүн биргелешкен чараларды координациялоого көңүл бурушту.

Жолугушуудан кийин министрлер энергетика тармагындагы кызматташтыкты кеңейтүүгө, өз ара пайдалуу демилгелерди илгерилетүүгө жана эки өлкөнүн ортосундагы стратегиялык өнөктөштүктү бекемдөөгө милдеттенмелерин билдиришти.