Qırğızıstan və Özbəkistan elektrik enerjisi təchizatı məsələlərini müzakirə edib

Qırğızıstanın Enerji naziri Altınbek Rısbekov Bişkekdə Özbəkistanın Enerji naziri Şerzod Xocayev ilə görüşüb. Nazirliyin məlumatına görə, görüşdə iki ölkə arasında enerji sahəsində mövcud əməkdaşlığın vəziyyəti və onun gələcək inkişaf perspektivləri müzakirə olunub.

Tərəflər xüsusilə elektrik enerjisinin qarşılıqlı təchizatı və tranzitinə, Mərkəzi Asiyanın vahid enerji sisteminin sabit işləməsinə və payız-qış dövrünün uğurlu keçməsi üçün birgə tədbirlərin koordinasiyasına diqqət yetiriblər.

Görüşdən sonra nazirlər enerji sahəsində əməkdaşlığı daha da genişləndirmək, qarşılıqlı faydalı təşəbbüsləri təşviq etmək və iki ölkə arasında strateji tərəfdaşlığı möhkəmləndirmək öhdəliyini bildiriblər.