Gazagystan 2029-njy ýyla çenli 13,3 GW täze elektr kuwwatyny işe girizer

Gazagystanda 2029-njy ýyl hem goşmak bilen 13,3 GW täze energiýa kuwwatyny işe girizmek meýilleşdirilýär. Onuň 7,4 GW-sy adaty energiýa çeşmelerinden, 5,9 GW-sy bolsa täzelenýän energiýa çeşmelerinden (TEÇ) bolar. Bu barada energetika ministriniň orunbasary Bakytjan Ilýas Hökümetiň mejlisinde habar berdi.

Orunbasaryň sözlerine görä, meýilleşdirilen täze kuwwatlar Gazagystanyň ykdysadyýetiniň we ilatyň elektrik energiýasyna bolan ähli zerurlygyny kanagatlandyrmaga mümkinçilik berer, şol sanda süni intellekt we iri maglumat merkezleri üçin meýilleşdirilýän energiýa sygymly infrastrukturany üpjün eder. Şeýle hem 20% generasiýa kuwwatynyň artykmaçlygy emele geler.

Energetika ministrliginiň maglumatlaryna görä, häzirki wagtda esasy kuwwaty kömür elektrik stansiýalary (13,7 GW), gaz stansiýalary (7,1 GW) we iri suw elektrik stansiýalary (2,5 GW) emele getirýär. TEÇ obýektleriniň paýy 3,8 GW-a deňdir. 2026-njy ýylyň 9 aýynda elektrik öndürmekde TEÇ-iň paýy 8,5 göterime ýetdi, meýilnamada 7 göterim göz öňünde tutulýardy. 2035-nji ýylyň ahyryna çenli azyndan 8,4 GW täze TEÇ kuwwatynyň işe girizilmegi gözlenilýär, onuň takmynan 1,8 GW-sy Gün energiýasy.