Qozogʻiston 2029-yilgacha 13,3 GVt yangi quvvat ishga tushirishni rejalashtirmoqda

Qozogʻistonda 2029-yilgacha (shu jumladan) 13,3 GVt yangi energiya quvvatini ishga tushirish rejalashtirilgan. Shundan 7,4 GVt anʼanaviy generatsiya manbalaridan, 5,9 GVt esa qayta tiklanuvchi energiya manbalaridan (QTEM) iborat boʻladi. Bu haqda energetika vazirining oʻrinbosari Baxytjan Ilyas hukumat yigʻilishida maʼlum qildi.

Oʻrinbosarning taʼkidlashicha, rejalashtirilgan yangi quvvatlar iqtisodiyot va aholining barcha elektr energiyasi ehtiyojini qoplash imkonini beradi, shu jumladan sunʼiy intellekt va yirik maʼlumotlar markazlari uchun moʻljallangan energiya talab qiluvchi infratuzilmani taʼminlaydi. Shuningdek, 20 foizli ortiqcha generatsiya quvvati shakllanadi.

Energetika vazirligi maʼlumotlariga koʻra, hozirda asosiy quvvatni koʻmir elektr stansiyalari (13,7 GVt), gaz stansiyalari (7,1 GVt) va yirik gidroelektr stansiyalari (2,5 GVt) tashkil etadi. QTEM obʼektlarining hissasi 3,8 GVt. 2026-yilning dastlabki 9 oyida QTEMning umumiy elektr energiyasi ishlab chiqarishdagi ulushi 8,5 foizga yetdi, rejada esa 7 foiz nazarda tutilgan edi. 2035-yil oxirigacha kamida 8,4 GVt yangi QTEM quvvati ishga tushirilishi kutilmoqda, shundan taxminan 1,8 GVt quyosh energiyasi.