Azerbaýjanda iň pes zähmet haky 2027-nji ýylyň ýanwarynda ýokarlanyp biler

Azerbaýjanda iň pes zähmet hakynyň 2027-nji ýylyň ýanwarynda ýokarlandyrylyp biljekdigi habar berilýär. Day.Az-yň habaryna görä, muny Milli Mejlisiň Ykdysady syýasat, senagat we telekeçilik komitetiniň agzasy Aydyn Hüseýnow Modern.az-a beren interwýusynda mälim edipdir. Deputatyň sözlerine görä, ýokarlanyş mukdary kesgitlenende inflýasiýa görkezijileri bilen bir hatarda indiki ýyl üçin baha ösüşiniň çaklamalary hem göz öňünde tutular.

Liberal ykdysatçylar merkeziniň başlygy Akif Nesirli "Bakupost"a beren habarynda, kabul edilen soňky kanuna laýyklykda iň pes zähmet hakyna her ýylyň başynda seredilmeli we goşmaçalar girizilmelidigini aýtdy. Onuň tejribä esaslanan pikirine görä, iň pes zähmet haky azyndan 50 manat ýokarlanyp biler. Emma ol bu mukdaryň 2025-nji ýylda iň pes zähmet haky soňky gezek ýokarlandyrylandan bäri emele gelen inflýasiýany ödemeýändigini belläp, azyndan 500 manat töweregi bolmagynyň has makul hasaplaýar.

Nesirli, şeýle hem Azerbaýjan hökümetiniň 2001-nji ýylda Ýewropa Zähmet Hartiýasy öňündäki borjuna üns çekdi. Bu borja görä, iň pes zähmet haky 2006-njy ýyla çenli ortaça aýlyk zähmet hakynyň 60 göterimine çykarylmalydy. Onuň sözlerine görä, 25 ýyl geçenine garamazdan, hökümet entek bu borjy ýerine ýetirmedi.