Ozarbayjonda minimal ish haqi 2027-yil yanvaridan oshirilishi mumkin

Ozarbayjonda minimal ish haqini 2027-yil yanvaridan oshirish mumkinligi xabar qilindi. Day.Az xabar berishicha, buni Milliy Majlisning iqtisodiy siyosat, sanoat va tadbirkorlik qoʻmitasi aʼzosi Aydin Huseynov Modern.az bilan suhbatida maʼlum qilgan. Deputatning soʻzlariga koʻra, oshirish miqdori belgilanayotganda inflyatsiya koʻrsatkichlari bilan birga kelgusi yil uchun narx oʻsishi prognozlari ham hisobga olinadi.

Liberal iqtisodchilar markazi raisi Akif Nasirli "Bakupost"ga bergan izohida, qabul qilingan soʻnggi qonunga koʻra, minimal ish haqini har yil boshida koʻrib chiqish va oʻzgartirishlar kiritish kerakligini aytdi. Uning tajribaga asoslangan fikriga koʻra, minimal ish haqi kamida 50 manat oshirilishi mumkin. Ammo u bu miqdor 2025-yilda minimal ish haqi soʻnggi marta oshirilganidan beri yuzaga kelgan inflyatsiyani qoplamasligini taʼkidladi va minimal ish haqi kamida 500 manat atrofida boʻlishini maʼqulroq deb hisobladi.

Nasirli, shuningdek, Ozarbayjon hukumatining 2001-yilda Yevropa Mehnat xartiyasi oldidagi majburiyatiga ishora qildi. Unga koʻra, minimal ish haqi 2006-yilgacha oʻrtacha oylik ish haqining 60 foiziga yetkazilishi kerak edi. Uning soʻzlariga koʻra, aradan 25 yil oʻtganiga qaramay, hukumat bu majburiyatni hali ham bajarmagan.